شهادة من محمد المرحوم

طول السنين الماضية عشنا مجازر وأيام سيئة كتير لكن يوم الجمعة والسبت اليوم هنه أقسى شي عشتو إلى الآن.
طول السنين الماضية كنت طالب طب مساعد بشتغل يلي بعرفو وبلجأ للأعلم مني وقت بحتار أو ما بعرف الإجراء اللازم للمريض.
لكن مبارح واليوم الوضع مختلف جداً، انا بالساعات الماضية كنت الطبيب الوحيد يلي بدو ياخد قرار وينفذ بدون رقيب علي إلا من يلي خلقو، انا الشخص يلي بدو يعطي قرار الوفاة لمريض أو قرار العمل لمحاولة انقاذ حياة مريض، يلي بدو يقول (ياسر) لازم يطلع لغرفة العمليات قبل (فارس) لانو (فارس) وضعو سيء واحتمال انقاذو قليل بهيك وضع.

بالساعات الماضية انا كان لازم قول انو (نغم) لازم تطلع للعناية ومحمد لازم ينترك لانو من غير الممكن انقاذو، كان لازم حول ٦ اشخاص للعمليات حتى تنبتر اطرافهم ويعيشو بإعاقة طول عمرهم، بالوقت يلي كانوا مفكرين انو قصة القصف على بلدهم انتهت وقرروا يرجعوا يعيشوا حياتهم ويعيدوا روحها من جديد.

الساعات الماضية كانت مأساوية بالنسبة إلي بالمستشفى وللكادر الطبي كاملاً،ورغم كل شي مأساوي، لكن مافي مجال للاستسلام لانو مافي غيرنا، مافي حدا يحمل عنا اذا تعبنا او استسلمنا، قرار الاستسلام غير مسموح في ولازم تبقى تشتغل حتى توقع بصالة الاسعاف من التعب او ما يعود عندك القدرة لتقوم على رجليك.
بهي الأوقات لازم تنسى اهلك وتدعي انو ما حدا منهم يجي لعندك مصاب، لازم تنسى تطمن عليهم لانو مافي قدرة تشعر بحدا او تتذكر حدا، لازم بس تشتغل وتشتغل وتشتغل حتى توقف الإبادة أو ينتهي الأمر فيك بقصف المشفى (يلي ما كان بعيد عن انو يحصل سوا امتار قليلة) وساعتها بتكون اديت واجبك حتى النهاية وبتكون معذور عن أنو تشعر بأنك قصرت.
بهي الأوقات لازم تكون مشاعرك على جنب، لازم تنسى أصوات القصف والغبرة بالصالة وأصوات المرضى وعجقتهم وتهتم بالروح يلي امامك وتحاول تقدملها شي، كل تفكيرك بالجروح يلي شايفها وكل همك كيف بدك تعالجها.

انا واحد من الكوادر يلي صرلها من الساعة ٤ عصرا بيوم الجمعة ٦/٤ ما اخدت اي استراحة عن العمل وما توقفت عن العمل، ويلي اشتغلت بصمت حتى تحاول تساعد بإنقاذ مئات المصابين من شباب واطفال ونساء هي المدينة، هي الكوادر يلي الها من ٥ سنين بعملها ويلي ما وقفها عن واجبها لا قصف ولا جوع ولا حصار ولا شي، ويلي ما طلبت من العالم الا انو تتوقف الابادة ويوقف القتل.

هي الكلمات بعتتها من قسم الإسعاف بمدينتي #دوما يوم اللي العالم كان كلو عميشوف بث مباشر على قنوات النظام كيف عمننقصف وتباد بلادنا وأهلنا وهنه صامتين.

#مالنا_غيرك_يا_الله
#الغوطة الشرقية
#دوما

شهادة من محمد المرحوم ، دوما ، 8-4-2018