نزار ،25 سنة – الوثائق الشخصية

 

أنا كنت طالب جامعي و حاولت حافظ على الإثباتات الشخصية مثل الهوية و شهادة البكالوريا و بطاقة الجامعة و أوراق الجامعة يلي كانت موجودة معي قبل الحصار مشان اقدر كمل لما تسمح الظروف  .

بعد ما طلعنا للشمال السوري صرت فكر بموضوع الدخول لتركيا مشان كمل دراستي ، واللي وصلني عن الوضع بتركيا انو كل شي بيمشي بالأوراق و الإثباتات و المصدقات .

يعني مثلا أنا ما معي جواز سفر من قبل الحصار و بالحصار كان الحصول على جواز سفر غير متوفر و لا متاح، وحتى طلع جواز سفر من تركيا بدها إجراءات صعبة و مكلفة بالنسبة لوضعي لأن مرتبط بالتجنيد و الخدمة الإلزامية فالكلفة عالية جدا فتركت الموضوع .

وحتى سألت مشان التسجيل بالجامعة ، أنا كنت دارس سنة ثانية تجارة و اقتصاد قبل الحصار ، فكان في كثير أوراق مطلوبة  مشان استكمال الطلاب مثل كشف علامات السنين السابقة و شهادة البكالوريا الأصلية الموجودة بوزراة التربية و هادا سببلي مشكلة  ، أنا معي نسخ مصدقة عن شهادة البكالوريا لكن ما بتمشي هن طلبوا الشهادة الأصلية الكرتون ، و معي بطاقة الجامعة و وصل التسجيل فقط لكن ما معي كشف علامات ، و حتى تكملة الدراسة بالشمال السوري عم يتطلب كشف علامات بالشي يلي كنت مقدمو .

هدول الأوراق و الشهادات  ما قدرت استخرجهن لمى كنت بالغوطة لان ما كنت بقدر انزل على الجامعة مع الحصار يلي كان عالغوطة ، صرت أسأل انو كيف ممكن حدا يطالعي ياه من مناطق سيطرة النظام ، بس عرفت أنه استخراج هي الأوراق عم يكون صعب  لان لازم اعمل وكالة عند كاتب عدل معترف فيه عند النظام حتى اقدر ابعت هالوكالة  لحدى بعرفه بالشام يطلعلي الكشف من الجامعة طبعا غير انو ممكن يصير مشاكل و ما يمشي الحال بسبب سنوات الانقطاع الطويلة ، وبالأصل كيف بدي اعمل مثل هيك وكالة  و أنا موجود بالشمال و هون ما في كاتب عدل معترف في عند النظام .

أو عم يصير استخراج هي الأوراق عن طريق مكاتب و سماسرة عم تشتغل بهالموضوع و طبعا ما في شي ببلاش يعني كشف العلامات لوحده طلب 700$  عليه و هادا الشي عم يشكل ضغط علي ، يعني أنا لسى ما مستقر هون وعندي أولويات بالنسبة للمصروف و ما قدران أتعامل مع هيك أرقام  بس مشان استخرج هي الأوراق .

هي الأمور عم تصعب علي البداية الجديدة و عم تسببلي عقدة و مشكلة فوق مشاكلي بينما هي أمور كثير بسيطة وسهلة و روتينية بغير ظرف و بغير مكان  ، أما بوضعي و بهي الحالة عم توقف حياتي على ورقة أو مستند و يلي هي أساسا من حقي .

نزار ،25 سنة ،أعزب ، من دوما ، حاليا” مقيم بريف حلب الشمالي

الصورة : سمير الدومي