أحلامهم

بعد كل المعاناة في الحصار مازال لديهم الشغف في الدراسة .

كلمات قليلة من كل واحد منهم عن أحلامهم .

 

عمار بويضاني

الهندسة المعمارية حلم راودني منذ طفولتي ، ودائما كانت الصروح المعمارية تأسر انتباهي ، وكان يحزُّ في قلبي أن مدن بلدي سوريا أرض الحضارات باتت عبارة عن غابات اسمنتية عشوائية بلا روح ولا هوية عمرانية ولا ذوق فني يعبر عن تاريخ وحضارة هذا البلد و أيضا بلا أية صروح  حديثة تواكب التقدم العمراني . ولأن الحرب القاسية دمرت مدن بلدي الحبيب سوريا، عاهدت نفسي أن أصبح مهندسا معماريا رغبةً ببناء بلدي المدمر من جديد، علّيَ أعيد ألقه العمراني يوما ما .

 

  • ليلى بكري :

كان اختصاصي وقاية نبات و كنت الثانية على دفعتي و ضاللي سنة و بتخرج و كان حلمي كمل دراسات عليا و لكن بسبب الحصار ما قدرت كمل هالسنة . وهلأ بدي أسعى لتحقيق حلمي بالتخرج و لمى منرجع على سوريا بدنا نزرعها من جديد ،  و بحلم بالمستقبل بتأسيس شركة مبيدات صديقة للبيىة  لنحصل على افضل انتاج  بدون ما نأذي البيئة .

 

 

حسان طباجو

اخترت هندسة التصميم الميكانيكي بسبب رغبتي بالدخول بمجال الصناعة والتطوير الصناعي، و الدافع الأولي  حبي للرسم والتفاصيل بداخل كل آلة وكان هدفي يكون عندي مصنع كبير قدم من خلاله أعمال صناعية كبيرة بسوريا.حاليا الدافع تطور كونه ارتبط بشريكة حياتي، خطيبتي يلي بتدرس هندسة مدنية وفكرت اني لح اقدر شكل مع خطيبتي شريك ناجح على مستوى العمل والعائلة

 

 

  • صفاء كامل

قررت دخول كلية الاقتصاد فرع المحاسبة لأن عالم الاقتصاد و المال عالم واسع و مفتوح و يمكن من خلاله العمل على دراسة مشاريع خاصة ، و علم الادارة علم حديث نافع يفيد في بناء الشخصية و اكتساب مهارات التخطيط . درست  بهذا الاختصاص لأربع سنوات و توقفت بعدها حياتي من ناحية الدراسة الاكاديمية لسنوات بسبب الحصار .

 

  • محمود المرحوم

بالنسبة لاختصاص المعلوماتية و اختياري إله كان رغبة من وقت كنت بعمر 15 سنة ، بلشت بدورات صيانة للحاسوب و حبيت المجال كثير و بعد فترة صارت خبرتي بالكمبيوتر و بالتعامل مع برامجه أكبر ، لما وصلت للبكالوريا و لإنو كان مستواي بالدراسة ممتاز فشفت شو رأس الهرم بالاختصاصات الدراسية بمجال الكمبيوتر و لقيت هندسة المعلوماتية هي الرأس و مستقبلها واسع جداً لهيك حطيتها ببالي و قويت حالي و تعمقت بهالمجال و زاد شغفي فيه أكثر .

 

  • ندى هارون

من خلال  دراسة علم النفس أتمنى أن أصبح أكثر تفهما و تقبلا للناس من حولي  ، أريد أن أساعد الناس على تقبل بعضهم البعض وعلاج  الاضطرابات الموجودة عند الأطفال و الكبارالتي سببتها الحرب لهم ومساعدتهم على التكيف مع الواقع الجديد

 

  • أيمن برغلة
    أنا اخترت هالفرع لأني بطبعي الشخصي بحب التحدي و بحس بالمتعة لمى بتحكم بالأشياء و بفهم دقائق الأمور .

لمى كنت بالغوطة درست بمعهد الإلكترون و عرفت قديش في مجال للإبداع بهالمجال و من وقتها قررت إذا أجتني فرصة لكمل دراستي يوما ما أختار هالفرع .

 

رهف عربش

حبيت المحاسبة و إدارة الأعمال لأن بحس في نوع من القيادة و بيحتاج ذكاء بالتعامل مع الاشخاص كونوا لح تكون ضمن فريق وبيحتاج أيضا لذكاء بالتعامل مع معطيات متجددة دائما ممكن تكون مو ضمن حسابات فريقك طموحي اني اتخرج واقدر كون صاحبة عمل اعتمد في على نفسي وكون مستقلة

 

 

  • أسماء طالب

اخترت دراسة الحقوق يلي كان حلمي من بداية المرحلة  الثانوية، لأن مافيني شوف الخطأ واسكت ومافيني اتجاهل أي ظلم .

سوريا فيها ظلم وفيها مغيبين من قبل ال2011  وخلال سنوات الثورة  إزدادت الأمور سوء ، سوريا بلدنا بحاجة لجيل من الشباب يعمل على تحقيق العدالة و بتمنى أني ساهم بهالشي بيوم من الأيام و شوف سوريا بلد العدالة و الديمقراطية و الحريات .

 

 

  • زكريا الرفاعي

الطب هدف و حلم الصغر و ازداد شغفي فيه  لما كبرت وعرفت القيمة الحقيقية لهاد الإختصاص ، الطبيب هو الشخص يلي بيقدر وجع المريض وهو اللي بيتعب لساعات بغرفة العمليات و بيطلع والابتسامة على وجهه لأنه كان سبب بحياة إنسان . أنا شفت كثير ناس فقدت حياتها بالحصار بسبب نقص الكوادر و القدرات الطبية ..و بكرا إذا انتهت الحرب كتير ناس رح تكون بانتظار الأطباء لتضمد جراحها .